العدالة في مصر محبوسة جوة قصور
ما يوصلهاش إلا الحرامي و القاتل المأجور
و تحكيلك عنها دايما كلمة مذيع مشهور
العدالة ضربة قاضية على دماغ المظلوم
دايما تفرض شروطها على اللي جيبه مخروم
يصحى بالصبح يلقى إعدام عليه محكوم
العدالة فوق الجميع و الجميع تحت التراب
عمرها فيوم ما فرقت بين دقن و صليب و حجاب
تحط سدادة ودانها فين ما تسمع أصوات الشباب
العدالة كلمة ضايعة ويا دخان الحشيش
يوم ما تسأل عالحقوق تقولك: إنسى خلاص مفيش
العدالة دي أوضة ضلمة.. و كف نازل مالشاويش
العدالة تقوم تهوش في الهوا تضرب بارود
حروف رسالة بحبر باهت و دم سايل عالحدود
طريقها متناهي الصغر و أخرته دايما مسدود
العدالة رسمها لينا سلطان و خديوي و ملك و رئيس
سحرها في صرخة مكتومة و ان نطقت تروح فطيس
كلمة السر "الخيانة" لرشوة خدها واحد خسيس
العدالة تار شهيد و قلب أم انكوى بالهموم
ولا صورة و ضحكة صفرة للجناه وتحتها نجم النجوم
يا عدالة امتى تصحي و يرجع لنا حق المظلوم ؟؟
ليست هناك تعليقات:
إرسال تعليق