تخاريف العقل الظاهر " اديني مبرر.."

اديني مبرر..

اديني مبرر بعد ما "حسني" و "العادلي" و "عز" و "عزمي" و "عبيد" و بعض من أعوانهم مادخلوا السجن، يفضل الشعب عنده نفس عادات الإهمال و عدم الاهتمام بأي شئ من الأحداث الجارية حوله !!!


اديني مبرر أن المستشفى الجامعي بالاسكندرية يندلع فيها حريق النهارده و تكون الأسباب الأساسية اهمال الصيانة و متابعة الأجهزة !!! ...

أديني مبرر اني عشان أقدم لأحد من إخوتي بالجامعة لازم أكون أعرف موظف من شؤون الطلبة أو ادفع فلوس لأحد من العمال عشان أوراق التقديم تخلص !!!...

اديني مبرر أن والدي لازم يستعين بأحد من ضباط المرور عشان يقدم أوراق فحص السيارة دون التعرض لنهب الأموال تحت مسمى الدمغات و الضريبات الملزمة لتأمينات السيارة !!!...

اديني مبرر لكل شئ سلبي حوالينا ؟؟؟ ... اديني مبرر ان لسة في ناس بتسكت عن اي تجاوزات  قانونية في أشغالها ؟؟.. او اجتماعية لمجرد فروق في الدرجات العلمية ؟؟..

اديني مبرر ان كلامي و كلامك و كلام كل انسان بيتمنى الأحسن للبلد مايوصلش و يفضل مرصود و مكتوم بينك و بين نفسك ؟؟؟ ...

أديني مبرر اننا نعيش و نموت بنسأل "ليه؟؟" بدل ما ندور  بنفسنا على المبرر !!!... اديني مبرر أفخر ببلدي و حوالينا ناس بتنام و تصحى و عايشة ليه من غير مبرر ؟؟!!! ...

حتى الأسف عن الازعاج في كل مقال كان قبل كده .. مع الأسف مالوش سبب ولا مبرر !!!!