expr:class='"loading" + data:blog.mobileClass'>
كفرونا
ياللي كنا بنفكركم مسلمين
بتقولوا علينا بلطجية و متشردين
و في غير" التبرج" ماحناش فالحين
طب انتوا مين ؟؟
انتوا مين ياللي عملتم مالدقون ايافة
والرجولة اللي حيلتكم كانت عياقة
انتوا مش أهل الطهارة ده انتوا أهل للنجاسة
فين عقيدتك فين ايمانك ؟؟
لما يوم اتعرى جسمي فرحت فيا و قلت أحسن
آه يا معقل الخيانة .. عرضي كان في ايديك أمانة
فالح باسم الدين تكلمني ..و ترمي على شرفي المهانة
كفرونا
كفرونا و اجلدونا ..و ان صبرنا اشنقونا
مش حققتم المراد انتوا و أصحاب الكراسي بتسحلونا
جاي تقول "اولى لبلادنا برلمانها" ياخي أبوك لأبو الحكومة
كفاية ولا نقول كمان و مالحلال بتحرّمونا
كذبونا و كفرونا يا ناس عقولها ساكناها العفونة
كفرونا .. كفرونا !!
ارسم
ارسم سحابة و تخيل انك فوق ربوعها عايش
شايف في كام طاقة نور و في كام بيت على الهامش
يمكن تكون حلوة لكن حواسك ماحساهاش
فين ريحة الورود في الجناين لم تغيرها ريحة العوادم ؟
فين صوت عبد الحليم وفجأة تسمع صوت النوادب ؟
حتى عينيك من غير ما تشوف الوجوه تكون وسط الدنيا غايب
ارسم قمر تسهر عليه و تشوف عيون العشاق
سارحين في مركب ورق في قلوبهم الأشواق
نور القمر وشوش في قلب كل حزين
يدق باب عشقه و ينسى كل آنين
دي الفرصة مش دايمة و اياك تقول بعدين
أهل الندم ماتوا لما الحبيب مات جواه الحنين
ارسم نجوم بين كل نجمة تلقى سكة سفر وموال
ده بحر الفضا عاتم راح تمشي فيه أميال
الخوف من المجهول وارد على كل انسان
عند النجمة اللي جاية راح تلقى شط أمان
خد بالك حاتلاقي يافطة "ممنوع الانتظار"
و لحد ماتلاقي المرسى مكتوب الرحيل أقدار
ارسم في كل مكان و ارسم بكل لون
من غير خط القلم احساسك يكون مسجون
ارسم يمكن تعيش ..ارسم يمكن تفوق
يمكن تلاقي الدنيا بتكلمك في سكون
خلي القلم يحكي المه لكون مفتوح
الصرخة مش مسموعة لو كان بابها مقفول
جناحك الأبيض
بينوَّر الدنيا و يخلي الليل نهار
وخطوة بخطوة فقلبي ليك مشوار
يحكي لخط العمر حكاياته
و ضحكة و دمعة جوة القلب بيباتوا
على جناحك في نسمة صيف معدية
ووقت البرد دفاك بيغير الدنيا
بحبك كلمة تملى عينيك من الفرحة
ووعد بأن غير الموت مفيش فرقة
وايه يعني ؟؟!
لو مفيش فجيوبنا غير ملاليم
مادام قلبك هنا معايا و حبك جوه قلب مقيم
شوف غيرنا عملت لهم ايه الملايين
في الهم دايما صاحيين و نايمين
أنا حبي ليك قالوا عليه افلاطوني
لو أفلاطون شافه يقول ده في الأساطير
بصبرعلى الأيام و صبري ماهوش قليل
يمكن تحس بحالي ده عشقي كان لك أسير
